A Garda Civil interceptou un vehículo que circulaba en sentido contrario no quilómetro 337,5 da estrada N-525, na glorieta na que conflúen os accesos ás autoestradas AP-9 e AP-53, en Santiago de Compostela. Segundo informou o Instituto Armado, os feitos ocorreron na tarde do pasado sábado, 28 de marzo, cando unha patrulla que auxiliaba un vehículo avariado foi alertada da presenza dun turismo que transitaba de xeito irregular. Ante o risco incrementado por ser unha glorieta con visibilidade reducida e elevada intensidade de tráfico, un dos gardas civís introduciuse no vehículo oficial e situouno na traxectoria do turismo. Con esta manobra logrou a súa detención sen que se producisen danos, evitando así a posibilidade dunha colisión frontal con outros usuarios da vía.
Os axentes verificaron que o erro se debeu a unha posible distracción ou errónea interpretación da sinalización por parte do condutor, descartando calquera intencionalidade ou influencia de alcol ou drogas. A Garda Civil procedeu á confección do correspondente boletín de denuncia por unha suposta infracción moi grave ao Regulamento Xeral de Circulación. De ser ratificada, esta conduta conleva unha sanción de 500 euros e a detracción de 6 puntos do permiso de conducir. O Sector de Tráfico de Galicia insistiu tras este incidente na necesidade de manter en todo momento unha atención permanente á condución para evitar este tipo de situacións de perigo no volante.
