Axentes da Policía Local de Santiago de Compostela detiveron na mañá do domingo unha moza á que lle foron intervidos 140 gramos de cocaína e unha importante cantidade de diñeiro en efectivo durante unha actuación nun inmoble da rúa da Rosa, no Ensanche compostelán. A intervención produciuse tras unha alerta cidadá por unha discusión no interior do edificio.
Segundo fontes coñecedoras do operativo, cando as patrullas acudiron ao lugar localizaron á nova cunha bolsa que contiña a substancia estupefaciente e varios miles de euros. A muller manifestou ante os axentes que tanto a droga como o diñeiro pertencían a outra persoa que se atopaba con ela na vivenda. Ese individuo abandonou o inmoble antes da intervención policial e continúa en paradoiro descoñecido, polo que a investigación segue aberta.
Os feitos ocorreron nun edificio no que, segundo relataron residentes da zona, se viña detectando desde había meses un trasiego continuado de persoas, circunstancia que levantara sospeitas sobre a posible existencia dun punto de venda de drogas. A chamada que alertou da discusión no interior do inmoble, na que tamén se apuntaba a un posible caso de violencia de xénero, mobilizou varias patrullas policiais arredor das 10:00 da mañá.
De acordo coa información dispoñible, a persoa que fuxiu entregoulle previamente a bolsa á súa parella para que abandonase o edificio, mentres el escapaba por unha das fiestras. Posteriormente, decretouse unha orde de busca e captura contra el.
A muller, de nacionalidade española e estudante en Santiago, foi detida como presunta autora dun delito contra a saúde pública e posta a disposición xudicial. Tras declarar, quedou en liberdade sen medidas cautelares, ao considerar a autoridade xudicial que existe arraigo e que xa se practicaron as actuacións necesarias para a investigación.
QUEIXAS DOS VECIÑOS DO ENSANCHE
Veciños do Ensanche consultados sinalan que a presenza deste tipo de pisos xera situacións de inseguridade, con discusións frecuentes e concentración de persoas nas inmediacións dos edificios. Asociacións veciñais da zona levan tempo reclamando unha maior intervención policial ante a existencia doutros posibles puntos de venda de drogas nalgúns barrios da cidade.
Desde a Policía Local indicaron que a investigación continúa aberta co obxectivo de esclarecer completamente os feitos e determinar a responsabilidade das persoas implicadas.
