O subministro eléctrico en Santiago de Compostela recobrou a normalidade na madrugada deste venres despois de dúas avarías provocadas polo temporal, que deixaron sen luz a unhas 4.000 persoas en distintos puntos da cidade.
Segundo fontes de Naturgy, a primeira incidencia produciuse arredor das 17:36 do xoves, cando a caída dunha árbore sobre unha liña eléctrica interrompeu o servizo a unhas 1.000 persoas. Para garantir a subministración mentres se realizaban os traballos de reparación, a compañía activou tres grupos electróxenos, o que permitiu restablecer completamente o servizo sobre as 05:30 deste venres.
A segunda avaría rexistrouse ás 18:12 do xoves e estivo relacionada coa treboada, que deixou máis de 200 raios en Galicia ao longo da xornada. Esta incidencia afectou a arredor de 3.000 persoas e a subministración quedou reposta cara á medianoite.
Desde a compañía indicaron que os equipos técnicos traballaron de forma continuada para resolver as incidencias e restablecer o servizo no menor tempo posible, nun contexto marcado polas condicións meteorolóxicas adversas.
