Un novo despregue de medios de emerxencia tivo lugar na noite deste sábado diante do Asador Gonzaba, situado na rúa Nova de Abaixo, no centro de Santiago. O incidente obrigou ao desaloxo dos clientes que se atopaban ceando no interior do establecemento, despois de que se producise un incendio que xerou unha importante humareda no baixo do edificio.
Segundo a información recollida, o lume orixinouse entre a campá extractora e a cheminea, unha zona especialmente sensible que provoca unha rápida acumulación de fume no interior do local. A situación foi atendida polo turno de garda dos bombeiros, que tivo que cortar a rúa para poder operar con seguridade e despregar os medios necesarios para a intervención.
Tal e como explicaron os servizos de emerxencias, tratábase dun fogo incómodo, xa que ademais de afectar ao baixo do establecemento polo fume, tamén era necesario actuar directamente na cheminea. Para iso, os efectivos empregaron a escaleira mecánica co obxectivo de acceder ao tellado do edificio e atacar o foco desde o exterior.
Os bombeiros traballaron no lugar cun lume xa controlado, que previsiblemente se orixinou pola acumulación de feluxe e graxas na estrutura exterior do sistema de extracción de fumes, unha circunstancia habitual neste tipo de instalacións cando non se produce unha limpeza adecuada ou periódica.
Segundo indicaron fontes veciñais a Xornal de Compostela, no operativo participaron dende aproximadamente as 23:00 ata a medianoite dous camións e un coche de bombeiros, así como dous coches da Policía Local e un da Policía Nacional.
Este novo episodio engádese a unha longa lista de antecedentes no mesmo local. O primeiro incendio rexistrouse en 2009, afectando tamén ao sistema de extracción de fumes. Posteriormente producíronse novos incidentes nos anos 2021 e 2022, así como outro incendio recentemente en agosto de 2025. O ocorrido este xaneiro de 2026 converteuse así no máis recente dunha serie recorrente.
Polo momento, non se comunicaron danos persoais, nin se informou de medidas adicionais máis alá da intervención dos servizos de emerxencia, á espera de que se esclarezan as circunstancias exactas do sucedido e se avalíe o estado das instalacións do restaurante tras o incendio.
