A Garda Civil detivo o pasado venres a unha muller como presunta autora dun delito de apropiación indebida no Aeroporto Rosalía de Castro de Santiago de Compostela, despois de ser localizada co diñeiro que había no interior dun bolso esquecido por outra pasaxeira na zona de embarque.
Segundo informou o Instituto Armado nun comunicado, os feitos producíronse cando unha viaxeira deixou un bolso de pequenas dimensións sobre un banco da área de embarque e abandonou posteriormente o lugar sen decatarse. Ao regresar pouco despois, a muller comprobou que o obxecto xa non se atopaba onde o deixara.
No interior do bolso había documentación de identidade de catro membros dunha mesma familia, os cartóns de embarque, un teléfono móbil e 1.060 euros en efectivo, polo que se deu aviso ás forzas de seguridade presentes nas instalacións aeroportuarias.
Tras realizar diversas comprobacións, a Garda Civil conseguiu identificar a unha muller que se atopaba na cola de embarque dun voo con destino a outro país, portando o diñeiro en efectivo denunciado como desaparecido. As investigacións permitiron confirmar que o bolso fora arroxado á papeleira dun dos aseos do aeroporto, sen o efectivo no seu interior.
A actuación culminou coa detención da sospeitosa, que foi posta a disposición xudicial como presunta responsable dun delito de apropiación indebida. A Garda Civil continúa coas dilixencias correspondentes no marco desta actuación.
