A Garda Civil investiga a tres veciños de Santiago, de 35, 38 e 43 anos de idade pola súa suposta implicación nun furto de cobre e un roubo con violencia e intimidación na mesma empresa de Valga.
Segundo informaron fontes da Comandancia de Pontevedra, o primeiro dos delitos cometeuse a finais de febreiro, cando traballadores dunha empresa de aluminio detectaron o acceso ao recinto dunha furgoneta branca rotulada co nome dunha empresa de aluguer de vehículos. Os traballadores observaron como os ocupantes da furgoneta subtraeron unha bobina de grandes dimensións de cable de cobre, valorada en 5.000 euros.
O segundo delito cometeuse a mediados de marzo, cando a mesma furgoneta volveu acceder ao interior do recinto. Nesa ocasión, o vehículo estaba ocupado por tres persoas que se dispuñan a cargalo con material metálico que localizaran no interior da empresa.
Un dos empregados interceptounos cun elevador de carga, para tentar bloquear a furgoneta e os sospeitosos, ao verse acurralados, comezaron con ameazas de morte e a golpearlle con tacos de madeira, causándolle lesións leves nun brazo e unha man. Finalmente, lograron abandonar o recinto, aínda que sen conseguir levar o material.
Estes feitos foron denunciados pola xerencia da empresa ante a Garda Civil, que despregou un dispositivo de localización da furgoneta, con efectivos dos postos de Valga, Padrón e Milladoiro. Ao detectar o seguimento dos axentes, os sospeitosos abandonaron a furgoneta nunha zona boscosa na Escravitude, en Padrón, onde foi localizada e devolta á empresa propietaria.
Finalmente, identificouse e localizou ao tres presuntos ladróns, investigados por un furto e por un roubo con violencia en grao de tentativa. Os investigados contan cun amplo historial delituoso por subtracción de material metálico en empresas de extrusionado de aluminio da zona, feitos labores no últimos tres anos.
