A Garda Civil logrou desarticular na contorna de Santiago de Compostela un grupo criminal dedicado ao tráfico de drogas, nun operativo que se saldou con 6 persoas detidas (tres delas xa ingresaron en prisión por orde xudicial), máis de 1.500 plantas de cannabis intervidas, 29.000 euros e catro vehículos comisados.

Segundo informaron fontes da Comandancia, as actuacións, bautizadas como ‘Operación Smell’ e coordinadas por un xulgado de Arzúa, foron levadas a cabo polo Equipo Roca da Garda Civil de Santiago, en colaboración con axentes do posto de Sigüeiro. As pescudas comezaron tras detectarse consumos eléctricos irregulares nos municipios do Pino e Oroso. Alí, os axentes conseguiron localizar dúas naves industriais sospeitosas, susceptibles de albergar plantacións ‘indoor’ de marihuana.

A fase de ‘explotación’ do operativo levou a cabo cando os axentes detectaron a presenza de tres persoas (dous veciños de Negreira e un de Cambados, que foron detidos) nas instalacións da nave industrial de Oroso. Un deles portaba dous sementeiros con 132 plantas de ‘cannabis sativa’

REXISTRO DE NAVES E DOMICILIOS

Na inspección da nave, os axentes localizaron unhas 800 plantas desta variedade, así como 430 gramos de marihuana seca e preparada para a súa manipulación. As instalacións contaban con sistemas de iluminación, ventilación e control térmico.

Posteriormente, os efectivos trasladáronse á nave do Pino, en cuxo rexistro atoparon 573 plantas de ‘cannabis sativa’, e 96 gramos de marihuana seca. Tras estes achados, a Garda Civil rexistrou os domicilios dos detidos e alí incautouse doutros 13 quilos de marihuana envasada ao baleiro, básculas de precisión, material de pesada e embalaxe, 29.000 euros en efectivo e 4 vehículos supostamente empregados para o transporte e distribución da droga. As investigacións permitiron localizar posteriormente a outros 3 integrantes deste grupo, veciños de Ames, Cambados e Vilagarcía, que tamén foron detidos.

DELITOS

A Garda Civil atribúe aos 6 arrestados os delitos de tráfico de drogas, pertenza a grupo criminal, branqueo de capitais, falsidade documental (placas de matrícula) e defraudación de fluído eléctrico. Os detidos, xunto coa droga, o diñeiro e o resto de material intervido, foron postos a disposición do xulgado de Arzúa, que acordou o ingreso en prisión provisional de tres dos investigados.