A Policía Nacional deu por desmantelado un importante punto de venda de sustancias estupefacientes en Santiago de Compostela tras unha operación desenvolvida na madrugada do 21 de outubro. O dispositivo, denominado ‘Urbano’, rematou coa detención dun home acusado dun delito contra a saúde pública, segundo informou o propio corpo policial.
A investigación realizouse no marco do Plan Operativo de Resposta ao Tráfico polo Miúdo e Consumo de Drogas, centrado en detectar e desarticular redes locais de distribución. Os axentes identificaron ao detido como fornecedor de cocaína e heroína a varios puntos de menudeo da cidade, actuando como intermediario entre niveis superiores do tráfico e consumidores habituais da contorna compostelá.
Durante o rexistro efectuado nun domicilio situado entre Laraño e Pardiñas, os investigadores incautaron 300 doses de heroína, 100 de cocaína, dúas básculas de precisión, 1.400 euros en efectivo, diverso material para o manipulado e envasado das drogas e unha pistola de balíns.
Tras a súa detención, o sospeitoso pasou a disposición xudicial, e a autoridade competente decretou a súa posta en liberdade mentres continúa a investigación. A Policía Nacional considera con esta actuación neutralizado un punto de distribución relevante na área de Santiago, que fornecía a múltiples consumidores da comarca.
