UXT denunciou que un can de raza pitbull atacou a un traballador do refuxio de animais de Bando, en Santiago, o que provocou “graves lesións en brazos e pernas” ao operario, que realizaba tarefas rutineiras de limpeza das instalacións.
Segundo trasladou o sindicato, este mesmo can protagonizara un incidente semellante o pasado 29 de setembro, cando, tal e como asegura UXT, atacou a outra operaria que logrou evitar a mordedura grazas a unha rápida reacción. Tras isto, UXT afirma que trasladaron a información por correo electrónico ao concelleiro de Dereitos dos Animais, Xesús Domínguez, así como á alcaldesa, Goretti Sanmartín, instando a ambos a “adoptar medidas urxentes para evitar ter que lamentar consecuencias máis graves”. Tamén denunciaban a “ausencia dun protocolo de actuación para estes casos, a inexistente oferta de formación permanente para as persoas traballadoras do refuxio e as deficiencias do servizo”.
Agora, UXT avanzou que presentará denuncia ante Inspección de Traballo por grave risco para a saúde das persoas traballadoras e manifestou que confía en que se interveña con “maior contundencia” que nas dúas ocasións anteriores en que se dirixiron a esta institución.
RESPOSTA CONCELLO
Mentres, fontes do Concello de Santiago, que preside o Padroado do refuxio –formado por unha decena de municipios da zona–, aseguraron que están en contacto desde o primeiro momento coa dirección do centro, así como coa familia da persoa afectada para seguir a súa evolución.
Ademais, explicaron que o can involucrado no incidente chegou ao refuxio hai un mes e está cualificado como potencialmente perigoso. Neste sentido, detallaron que o Padroado, que se reuniu a semana pasada, avaliou a situación deste exemplar por mor dun primeiro expediente e xa se pediu á empresa encargada de riscos laborais formación específica por se non a tivesen sobre protocolos de actuación con animais agresivos ou potencialmente perigosos.
Do mesmo xeito, estas mesmas fontes afirmaron que o edil Xesús Domínguez solicitou informes á dirección do centro e á veterinaria para remitir ao xulgado, que será o que determine as actuacións pertinentes.
