A Garda Civil, en coordinación con efectivos da Axencia Tributaria, incautaron 150 paquetes de tabaco no aeroporto Rosalía de Castro, en Santiago de Compostela, que incumprían a cantidade máxima permitida pola normativa de Impostos Especiais. Segundo informou o instituto armado, o tabaco, valorado aproximadamente en 750 euros, procedía de Lanzarote e tiña como destino final a localidade de Boiro.
Esta intervención enmárcase nos controis habituais que a Garda Civil realiza, mediante o seu Servizo Fiscal e de Fronteiras, de forma continuada nas instalacións aeroportuarias e en estreita colaboración coa Axencia Tributaria. Como resultado desta actuación, levantouse a correspondente acta de infracción administrativa por contrabando de tabaco. Os 150 paquetes intervidos quedaron a disposición da Autoridade competente.
