A Garda Civil deu por desarticulado un grupo criminal itinerante especializado no roubo de cable de cobre, que tiña a súa base de operacións en Santiago de Compostela e ao que se lle atribúen, polo momento, 13 delitos cometidos na provincia da Coruña. A investigación, bautizada como Operación Redcupru, arrincou o pasado 1 de maio tras un roubo en Touro, e culminou coa detención de seis homes de entre 24 e 31 anos, todos con vínculos directos coa capital galega.
Segundo informou a Comandancia da Garda Civil, os arrestados pasaban as noites en vehículos estacionados en Santiago e desde alí planificaban os seus golpes. As súas accións dirixíanse a zonas boscosas e pouco transitadas, próximas a estradas secundarias con tendido eléctrico ou telefónico paralelo, onde podían operar sen ser detectados.
O grupo, organizado de forma xerárquica, utilizaba un sistema de dous vehículos: un deles realizaba funcións de lanzadeira para anticipar controis policiais e o outro, unha furgoneta, era o que se empregaba para cometer o roubo. Todas as accións tiñan lugar de noite, utilizando vehículos de alugueiro sen condutor, o que dificultaba a súa identificación.
Unha vez no lugar elixido, os delincuentes cortaban os cables en tramos de 2 ou 3 metros, que logo cargaban na furgoneta. Para evitar ser detectados, abandonaban o lugar por vías rápidas ata puntos onde ocultaban o material sustraído.
A clave da operación estivo na identificación anticipada do seguinte golpe previsto, o que permitiu montar un operativo de vixilancia que culminou coa súa interceptación na peaxe da AP-9 en Sigüeiro, no concello de Oroso. Alí, os axentes atoparon máis de 3 toneladas de cable de cobre, ademais de roupa escura, luvas e ferramentas de corte.
A Garda Civil tamén confirmou que se lles imputan os delitos de roubo con forza, pertenza a grupo criminal, estragos e apropiación indebida. Os dous vehículos foron incautados e o material recuperado xa foi restituído á empresa Telefónica España, afectada polos roubos.
Os detidos foron postos a disposición do Xulgado de Instrución número 2 de Ordes, aínda que a operación continúa aberta e non se descartan novas detencións nas vindeiras semanas. A investigación contou coa colaboración do Equipo Roca e axentes de Santiago, que realizaron o seguimento do grupo desde os primeiros roubos rexistrados.
