Os servizos de emerxencia rescataron na tarde deste xoves un bebé que quedou atrapado no interior dun coche en Santiago de Compostela. Segundo fontes do 112 Galicia, os feitos ocorreron sobre as 16:50 horas na rúa Emilio e Manuel do Restollal.
Foi un particular o que alertou, solicitando axuda para abrir o vehículo onde quedara encerrado un menor. Por iso, o Centro Integrado de Atención ás Emerxencias deu aviso a Urxencias Sanitarias, aínda que non foi necesaria a súa intervención. Con todo, desprazáronse ao momento axentes da Policía Local e os Bombeiros de Santiago, que liberaron o menor san e salvo, segundo confirmaron fontes do devandito servizo.
