Os Bombeiros de Santiago interviñeron durante a madrugada deste domingo nun incendio que calcinou o piso superior dunha vivenda compostelá. Ademais, durante os labores de ventilación e arrefriado identificaron un “obxecto pesado” que, segundo fontes consultadas por Europa Press, “parecía un proxectil”.
Deste xeito, foi un particular o que chamou ao 112 Galicia ao redor das 05.00 horas e explicou que estaba a arder a casa do seu veciño, que no momento da chamada atopábase no exterior. Segundo informou o 112 Galicia, ningunha persoa resultou ferida a consecuecia deste lume rexistrado nunha vivenda de tres pisos situada na rúa Agra da Garrida. Con todo, no operativo tamén participaron axentes da Policía Nacional, aos que se avisou tras identificar o proxectil e que, á súa vez, avisaron aos Tedax, e Local.
INCENDIO NO PREGUNTOIRO
Por outra banda, outro incendio calcinou unha habitación no segundo piso dunha vivenda da rúa do Preguntoiro, tamén en Santiago, neste caso tampouco se rexistraron danos persoais. Segundo detallou o 112, tivo constancia dos feitos ao redor das 23.00 horas deste sábado a través dun particular. Ademais, as persoas que se atopaban no interior do piso, unha muller e dous nenos, conseguiron saír á rúa. Ao momento acudiron os Bombeiros de Santiago, Urxencias Sanitarias de Galicia 0-61, de modo preventivo, e a Policía Nacional e Local.
