A concelleira de Festas do Concello de Santiago, Pilar Lueiro, celebrou o “éxito” das festas do Apóstolo celebradas ata o pasado mércores e que, na súa opinión, “avalan o acerto de apostar por que os veciños as fagan súas”. Así, asegurou que neste 2024 iniciaron un ciclo no que enfocan as festas cun programa “inclusivo, moi diverso, con actividades para todos os segmentos de público e pensadas para que a xente participe e non só sexa espectadora, que as senta como propias”.
Así mesmo, destacou que o programa de concertos e actuacións musicais, “ademais de atender a criterios de calidade artística e musical” estaba deseñado para “goce público e mirando de maneira especial” para os veciños de Compostela, entendendo, engadiu, que as festas “son tamén un escaparate” dos artistas locais e da produción propia “en convivencia con outras manifestacións artísticas chegadas doutras latitudes”. Na mesma liña, quixo subliñar a “boa acollida” doutros actos como a foliada pregoeira, o acto da Alba de Compostela, o Día do Traxe, as xornadas de folclore, a Festa Pícara ou a programación de cinema en parques da cidade e en puntos do rural.
