O concelleiro de Urbanismo de Santiago, Iago Lestegás, informou este venres no pleno da reunión mantida co Grupo de Estudos Territoriais da Universidade da Coruña (UDC), que analiza o mercado residencial da capital galega e que, segundo os primeiros resultados preliminares e provisionais, sinala que o aluguer é o que máis tensiona o mercado da vivenda.
Así, tal e como explicou, o indicador dos previstos no artigo 18 da lei polo dereito á vivenda que mostra resultados máis alarmantes é a variación acumulada do prezo do aluguer entre 2018 e 2023. “Os resultados que temos son aínda preliminares e provisionais, pero son moi útiles e ilustrativos, confirman, cuantifican e matizan algunhas tendencias evidentes pero tamén revelan algúns fenómenos que non o son tanto e que son interesantes”, manifestou o edil.
Neste contexto, Lestegás destacou que o goberno de Goretti Sanmartín está a dar “os pasos necesarios” para a declaración do municipio como zona de mercado residencial tensionado, sendo “conscientes” dos elementos positivos, pero tamén, engadiu, sendo coñecedores “dos fallos da Lei polo dereito á vivenda que é necesario corrixir tendo en conta a experiencia doutros territorios”.
Neste sentido, fixo referencia á proposición de lei impulsada polos sindicatos de inquilinos para apelar a que “o Congreso teña a oportunidade” de corrixir “estes fallos” cando someta a consideración e votación esta iniciativa lexislativa.
Así, no transcurso do pleno, en resposta a unha interpelación socialista, o concelleiro destacou que o Executivo municipal “non espera de brazos cruzados a que se resolva a problemática do aluguer de tempada”.
Con todo, Lestegás incidiu en que impulsan esta acción aínda que “esta documentación debería de preparala a propia Xunta”. Así mesmo, explicou que consideraron “conveniente e prudente” esperar a que o Goberno central complete a regulación “incorporando tamén a ela o aluguer de tempada” porque, na súa opinión, agora mesmo é “unha brecha” na lei.
OUTROS ASUNTOS
Por outra banda, no pleno ordinario de xullo tamén se trataron unha serie de asuntos de carácter económico, entre eles, a aprobación de tres créditos extraordinarios por importe de 1.980.344,63; 148.736,67; e 40.000 euros, así como dun suplemento de crédito de 11.605,88 para o pago de diversos conceptos.
Do mesmo xeito, deu luz verde por unanimidade á prórroga do convenio de colaboración formalizado o 1 de outubro de 2020 entre a Xunta e os Concellos de Santiago e Teo, para a coordinación dos servizos de transporte público con orixe e destino na urbanización dos Tilos, nos termos nos que foi redactado, por catro anos adicionais, ata o 30 de setembro de 2028.
Tamén se aprobaron por unanimidade dúas proposicións do grupo municipal do PP para a creación dunha estratexia para un Santiago de Compostela amigable coas persoas maiores e para a reordenación da oficina de información municipal de urbanismo e vivenda.
