O Concello de Santiago está disposto a “arrimar o ombreiro no que faga falta” no traslado duns 200 migrantes á capital galega, que se prevé a partir do 25 de xullo, dos 470 confirmados polo Goberno. Deles, algo máis dunha vintena derivaranse a Monforte, cuxo alcalde recoñeceu coñecer a noticia esta mañá.
Respecto ao caso de Santiago, a alcaldesa, Goretti Sanmartín, mostrou a súa colaboración en declaracións aos medios de comunicación tras a reunión da Xunta de Seguridade polo dispositivo para as festas do Apóstolo na que tamén participou a subdelegada do Goberno na Coruña, María Rivas.
Rivas reivindicou a actuación do Goberno ante “unha situación de emerxencia a que hai que dar unha solución”. “O Goberno ten a unha serie de entidades traballando nese programa, que son as que se encargan de facer a recepción destes migrantes e tramitar todos os recursos que necesitan”, explicou.
Desde o Executivo, continuou, encárganse de “trasladar a información” á comunidade autónoma, aos concellos que son os receptores dos migrantes, “pero que a xestión de todo o custo que supón traer a estas persoas migrantes vai con cargo ao programa do Goberno”.
Insistiu ademais en que a data do 25 de xullo que se baralla para a chegada dos primeiros migrantes é unha “previsión”. “O que sabemos é que o día 25 estaremos en disposición de dar resposta a ese número de persoas. Como estamos ante unha situación de emerxencia que é cambiante non sabemos se de face ao día 25 virán 200 ou virán 50, ou se cadra non vén ningún”, apuntou.
SANTIAGO, “ACOLLEDOR, HOSPITALARIO E SOLIDARIO”
Pola súa banda, a alcaldesa confirmou que si recibiu confirmación oficial a través da subdelegación do Goberno da chegada e reivindicou a Santiago como “concello acolledor, hospitalario e solidario”.
“Parécenos máis que lóxico e razoable que poidan vir a través xustamente deste programa que impulsa o Goberno do Estado, onde hai recursos e hai unha serie de asociacións que son as que fan o trámite”, sinalou.
Con todo, Sanmartín remarcou que Santiago “vai estar aí para arrimar o ombreiro no que faga falta” e que, en caso de ser necesario, desde o departamento de servizos sociais reforzarase ” a colaboración con esas entidades” para que os migrantes “poidan estar na mellor situación”.
Polo momento, entenden que o municipio “non ten que pór nestes momentos a disposición ningún tipo de espazo”. Respecto da cantidade de migrantes que se esperan, a alcaldesa entende que é “unha previsión máxima e razoable que o Concello pode asumir”.
