O Concello de Santiago activou un dispositivo de prevención de inundacións en varios puntos da capital galega ante a previsión de fortes precipitacións para este luns. Diso informou o goberno local a través dun comunicado no que explica que, ante as previsións de que unha DANA afectará á cidade compostelá este 17 de xuño, os técnicos municipais en colaboración con Viaqua realizan revisións de sumidoiros e redes de canalizacións de pluviais.

Segundo explicou o concelleiro Xesús Domínguez, desde o inicio dos traballos o pasado venres foron revisadas 300 sumidoiros e 1.000 metros de rede de pluviais, con especial atención a puntos que adoitan rexistrar inundacións en episodios de choivas intensas. O goberno santiagués destaca que o departamento de Obras traballa no plan de drenaxe e de novas canalizacións, actuacións para as que se reservan 300.000 euros nos orzamentos municipais deste ano.

Ademais, solicita a colaboración da Xunta para realizar intervencións contra as inundacións para realizar unha nova canalización de pluviais no Ameneiral do Viso, que padece estes problemas como consecuencia das obras da Cidade da Cultura e a ampliación da AP-9.