A sección sindical de CCOO da área sanitaria de Santiago-Barbanza denunciou a presenza de cascudas no servizo de cociña do Hospital Clínico Universitario de Santiago e pídelle á Xerencia que adopte “inmediatamente” medidas efectivas para controlar a situación.
Segundo relatan nun comunicado, o pasado 4 de setembro notificouse a aparición do insecto na comida dun paciente, un episodio que cualifican de “intolerable” e que, aseguran, “compromete a seguridade alimentaria”.
Sinalan ademais que a presenza de cascudas no servizo de cociña xa se producira de maneira “esporádica”, pero durante o mes de agosto proliferaron, especialmente debaixo dos fornos e dos sumidoiros, na zona das máquinas de lavado. Destacan tamén que esta situación se comunicou polas canles oportunas. O sindicato sinala que, segundo os profesionais do servizo, unha empresa externa está a aplicar un produto en determinadas zonas, pero desaparece axiña debido á limpeza exhaustiva que se realiza diariamente na cociña.
QUE SE ESTÁ FACENDO
A delegada de prevención de CCOO e membro do comité de seguridade e saúde da área sanitaria de Santiago-Barbanza, Ana Riveiro Corrales, trasladoulle á Dirección de Recursos Humanos, á Unidade de Prevención de Riscos Laborais, ao comité de seguridade e saúde e á Dirección de Relacións Externas da área unha solicitude de información e de adopción de medidas.
En concreto, o sindicato reclama saber desde cando ten coñecemento a Dirección da presenza de cascudas na cociña, que medidas se adoptaron, que programa de control de pragas se está a aplicar e que instrucións estabelece a empresa responsable. Tamén pregunta se existe un programa continuo de vixilancia e control e por que non se están selando as fendas e minimizando as posibles vías de entrada destes insectos.
