A Xunta de Galicia programa durante o mes de agosto catro veladas musicais gratuítas dentro do ciclo “Atardecer no Gaiás”, que reunirá seis artistas con propostas que van desde o rock alternativo ata a electrónica, o pop e a música urbana. Os concertos celebraranse na Cidade da Cultura, en Santiago de Compostela, e arrancarán este xoves, 6 de agosto, coa actuación de Dogo, un grupo compostelán de rock alternativo con influencias do post-punk e do shoegaze. O concerto comezará ás 21.00 horas na praza central do Gaiás.
GALICIAN ARME ACTUARÁ DURANTE A ECLIPSE TOTAL DE SOL
Na semana seguinte, o ciclo concentrará tres citas consecutivas entre o mércores e o venres. O 12 de agosto, o dúo lugués Galician Army presentará un set especial coincidindo coa eclipse total de Sol, un dos fenómenos astronómicos máis agardados do ano. A actuación combinará música electrónica e unha contorna especialmente preparada para acompañar a observación do fenómeno desde o Gaiás.
ISRAEL B, SANTA SALUT E SILEE NO ATARDECER FEST
O xoves 13 de agosto, a música urbana converterase na gran protagonista coa segunda edición do Atardecer Fest. A partir das 20.00 horas, subirán ao escenario tres artistas: Israel B, unha das figuras máis recoñecidas da escena estatal do rap; Santa Salut, coñecida polo carácter reivindicativo e comprometido das súas letras; e Silee, un dos novos nomes galegos do xénero urbano.
TURISTA SUECA PECHARÁ A DÉCIMO SEXTA EDICIÓN
A programación rematará o venres 14 de agosto coa actuación de Turista Sueca. Este concerto poñerá o punto final á décimo sexta edición de “Atardecer no Gaiás”, unha proposta consolidada dentro da programación cultural de verán da Cidade da Cultura.
