A alcaldesa de Santiago, Goretti Sanmartín, escolleu para os actos institucionais do 25 de Xullo un traxe confeccionado con sabas antigas de liño, deseñado por Melania Freire, como homenaxe á escritora Begoña Caamaño, protagonista do Día das Letras Galegas 2026. Na creación colaboraron tamén a ourive artesá Rosa Méndez e o obradoiro De Cotío, responsable xa do vestiario da rexedora na celebración do ano pasado. O estilismo complétase cuns zapatos da firma galega Miista, fundada pola compostelá Laura Villasenín.
O conxunto, composto por chaqueta e pantalón, está elaborado con dous tipos de liño procedentes de sabas antigas tecidas en tear, nunha evocación das mulleres anónimas que, ao longo da historia, traballaron este tecido. O deseño incorpora elementos inspirados no traxe masculino tradicional galego, como a lapela da chaqueta ou o detalle do abotoado do pantalón, reinterpretados cunha estética contemporánea. Ademais, os pequenos botóns de cristal de Murano, creados en colaboración con Rosa Méndez, e os botóns de fío feitos artesanalmente en De Cotío reforzan o carácter simbólico e artesanal da peza.
Segundo explicou Melania Freire, premio Mestre Mateo 2024 á mellor dirección artística por O Corno, o punto de partida do deseño naceu da observación de fotografías da Compostela do século XX, nas que aparecen mulleres anónimas camiñando polas rúas, afastadas do protagonismo. Foi nese proceso creativo cando xurdiu a conexión coa obra Circe ou o pracer do azul, de Begoña Caamaño, que reivindica precisamente esas vidas femininas invisibilizadas.
A deseñadora sinalou que incorporar a figura de Begoña Caamaño ao traxe da alcaldesa nunha xornada tan simbólica como o Día Nacional de Galicia foi unha decisión “fermosa e necesaria”. O resultado é unha peza que combina moda, memoria, artesanía e literatura, convertendo o vestiario institucional nunha homenaxe á autora e ás mulleres que inspiraron tanto a súa obra como a propia creación artística.
