O Consello de Goberno da Universidade de Santiago de Compostela aprobou este venres o acordo polo que se adapta o regulamento electoral xeneral da USC á Lei Orgánica do Sistema Universitario ante o proceso de elección de reitor ou reitora previsto para o primeiro terzo de 2026. Segundo informa nun comunicado, dado que os novos estatutos da USC están pendentes de aprobación e non é posible presentar neste momento unha reforma en profundidade do regulamento electoral xeneral da USC, realizouse unha modificación “puntual e transitoria” para adaptalo aos mandatos da lei do sistema universitario.
Deste xeito, queda establecido que as persoas candidatas deberán ser persoal docente e investigador permanente doutor a tempo completo, prestar servizos na USC e estar en posesión, como mínimo, de tres sexenios de investigación, tres quinquenios docentes e catro anos de experiencia de xestión universitaria nalgún cargo unipersonal, tal e como figura na disposición transitoria primeira da Lei orgánica. Outras modificacións do regulamento incumben á composición da Comisión Electoral Central, que estará composta por 12 membros da comunidade universitaria e presidida pola secretaria xeral da USC, e á actualización das novas categorías de persoal que existe no ámbito universitario.
PERSOAL
Aínda que na planificación de actuacións en materia de PDI para 2025 a USC prevía, a 31 de decembro, as baixas de 41 docentes, unha vez finalizado o curso académico, e xa con datos reais, a cifra final de baixas coñecidas ascende a 61. Así, o Consello de Goberno aprobou este venres unha proposta complementaria que “permita atender as novas necesidades”, de maneira que se crean 25 prazas de profesorado axudante doutor (15 para Santiago e 10 para Lugo), e outras dúas de profesor asociado para o Campus de Lugo.
Ademais, en materia de PDI aprobouse a asignación á área de coñecemento e servizo dunha praza de profesorado vinculado, os complementos por actividade investigadora de profesorado contratado (sexenios) e unha corrección de erros na proposta de complementos de recoñecemento de mérito docente de 2024. Pola súa banda, con respecto ao persoal investigador e coa pretensión de axilizar e adiantar no tempo o proceso, chegouse a un acordo polo que se regula a estabilización do persoal investigador de programas de recursos humanos con axudas do European Research Council (ERC). Ademais, ratificouse o acordo para o desenvolvemento do proceso extraordinario de encadre e acceso aos graos da carreira profesional horizontal no ámbito do persoal investigador e do persoal de apoio á investigación da USC.
INVESTIGADORES RAMÓN E CAJAL
Xa por último neste ámbito, deuse luz á proposta de incorporación de 18 investigadoras e investigadores Ramón e Cajal a 15 áreas de coñecemento da USC. A orde do día contemplaba outros asuntos que tamén contaron coa aprobación do Consello como cursos de estudos propios e memorias, regulamentos de fin de estudos ou os logos das cátedras institucionais Castelao, Otero Pedrayo e Rosalía de Castro.
