O profesor da Facultade de Veterinaria da Universidade de Santiago de Compostela, José Manuel Miranda López, forma parte dun equipo internacional que avaliou o potencial de 57 receptores sintéticos de carbohidratos como posibles axentes antivirais. O estudo, segundo informou a institución, ofrece resultados considerados “prometedores”, especialmente na loita contra o SARS-CoV-2, o virus responsable da COVID-19.
Estes receptores foron deseñados para recoñecer e unirse a carbohidratos específicos, en particular ás glicoproteínas localizadas na membrana de virus con cápsula. Nos ensaios realizados, os axentes mostraron unha actividade antiviral de amplo espectro, aínda que con maior eficacia fronte ao coronavirus que provocou a pandemia.
Miranda explicou que o equipo “sintetizou un total de 57 axentes de unión de carbohidratos e probou a súa actividade in vitro, seleccionando os dous que mellores resultados deron para realizar posteriormente un ensaio in vivo”.
O mecanismo descrito baséase na unión destes receptores aos N-glicanos da envoltura viral, o que impide o proceso de unión ou fusión do virus coa célula hóspede. Ademais, os investigadores comprobaron que as moléculas non resultaron tóxicas para o organismo receptor, o que reforza o seu interese como liña de investigación.
O traballo sinala que os N-glicanos constitúen obxectivos prometedores para o desenvolvemento de antivirais, ofrecendo unha vía alternativa aos receptores proteicos, que son os que habitualmente se empregan como diana nos tratamentos contra infeccións víricas.
