Os empregados da residencia de maiores Volta do Castro, en Santiago de Compostela, percorreron durante a mañá deste mércores 21 quilómetros desde Padrón ata o seu centro con vontade reivindicativa. A súa intención é esixir “máis medios, máis persoal e máis formación” ante a admisión de usuarios con trastornos psiquiátricos. A camiñada partiu ás 09.00 horas desde o Hotel Scala, en Padrón, e remata ao mediodía na residencia situada na capital galega, onde as persoas que secundaron a ruta serán recibidas cunha concentración e a posterior lectura dun manifesto.
O portavoz dos traballadores participantes, Xan Carlos Ansia, puxo en valor o esforzo que realizan con esta acción porque “hai xente que traballa ou saíu de traballar” e non están “especialmente preparados para facer unha camiñada”. Partiron 15 persoas desde o punto de saída, pero “xa hai algunha que non puido seguir”, explicou. Enganchados ás súas mochilas, os traballadores de Volta do Castro levan carteis con proclamas como a de “máis persoal”.
“MÁIS MEDIOS, MÁIS PERSOAL E MÁIS FORMACIÓN”
A motivación desta camiñada é a de reclamar máis recursos ante o ingreso autorizado pola Administración autonómica de pacientes psiquiátricos nas residencias de maiores. “Nós temos formación para coidar a persoas maiores, pero non a temos para coidar a persoas con problemas psiquiátricos”, explica o vogal. O representante dos empregados de Volta do Castro informa de que o traslado destes pacientes aos centros de maiores prodúcese como “única saída” ante a falta de prazas en centros sanitarios. “Para facer fronte a esa situación queremos máis medios, máis persoal, máis formación e protocolos”, esixe Xan Carlos Ansia. Esta non é a primeira acción de protesta que os traballadores do centro realizan para reclamar as súas demandas. Realizaron unha primeira manifestación o 19 de febreiro e o 1 de marzo presentaron ante a Xunta 70 sinaturas dos traballadores do centro.
