As máis de 3.600 enquisas recollidas entre o 23 de agosto e o 6 de outubro na segunda parte da campaña informativa ‘Fráxil’, do Concello de Santiago, sinalan que o 70 % dos que entrevistados pasan dúas ou máis noites na cidade. Tal e como detallou este luns en rolda de prensa a portavoz do Goberno local, Míriam Louzao, de todas as enquisas, o 63 % foron cubertas por persoas que visitaban a cidade desde o resto do Estado, mentres que o outro 37 % eran visitantes internacionais. Ademais, o 62 % viñan a Compostela realizando o Camiño, o 33 % por turismo e o 5 % restante para visitar a familia ou amizades.
Esta distribución, apuntou Louzao, débese a que as parellas que informaban a pé de rúa situábanse en puntos de entrada da ruta xacobea á cidade. Por tipoloxía de aloxamento, o 47 % quedaría en albergues, hostais ou pensións, seguido de hoteis (28 %) e de apartamentos turísticos (9 %). Sobre o tempo de estancia, a edil explicou que o 70 % das persoas enquisadas afirmaron que pasarían dúas ou máis noites na cidade, mentres que o 28 % sinalaba que só unha noite e o 2 % dixo que estaría unhas horas.
MEDICIÓN DE RUÍDO
Doutra banda, no marco desta campaña tamén se realizaron máis de 1.000 medicións a través de sonómetros, cunha media de 25 ao día. Así, tal e como manifestou a portavoz local, a media de todas as medicións que se recolleron foi de 67. Segundo Louzao, trátase dun dato “moi relevante”, xa que entre 40 e 80 decibeis considérase “ruído confortable”, semellante ao dunha conversación. De todas elas, o 2 % si que superaron os 100 decibeis e a medición máis alta alcanzou os 115, “que é o ruído que fai unha ambulancia”. Esta última tivo lugar o 26 de agosto na Praza do Obradoiro ás 12.50 horas. Con estes datos, Louzao considera que se conseguiu chegar a “un número significativo” de persoas de modo “directo” para informalos da campaña ‘Fráxil’ e de alternativas de visitas, ademais de obter información que, sinalou, axudará a definir posteriores accións.
MODELO “CONSCIENTE E RESPONSABLE”
En concreto, mencionou as medicións de ruído que, na súa opinión, “constatan que a maioría de persoas compórtanse responsablemente”. “Nesa porcentaxe do 2 % é no que temos que seguir traballando para reducilo ao 0 %”, manifestou. “En conxunto, podemos dicir que estas accións de información e concienciación son pasos adiante no camiño de sensibilización sobre a necesidade de buscar unha convivencia harmónica”, reivindicou. Nesta liña, Míriam Louzao tamén destacou que esta campaña “levantou unha gran expectación mediática”, o que, ao seu xuízo, “sitúa Santiago como un destino que traballa por un modelo consciente e responsable”.
