O goberno local de Santiago asegurou este xoves que a caída de varias árbores na Alameda compostelá polo temporal ‘Kirk’ “só pódese atribuír aos fortes ventos”, xa que eran exemplares que “tiñan os seus anos, pero estaban perfectamente”.
Así o explicou este xoves nunha rolda de prensa o concelleiro de Parques e Xardíns, Xesús Domínguez, acompañado polo xefe deste servizo, Gregorio López, na que fixeron unha avaliación tras o paso do temporal ‘Kirk’ por Santiago. Alí, incidiron en que as árbores estaban “sans”, pero que foron “moitas horas de ventos moi fortes”.
“Entre a noite do martes e a madrugada do mércores vivimos unha situación de temporal que, aínda que as ciclogénesis en Galicia son habituais, esta tivo un carácter excepcional, con ventos que alcanzaron os 114 quilómetros por hora e unha acumulación de precipitacións de máis de 48 litros”, incidiu Domínguez.
Ventos que afectaron a árbores “maduras e sas” en toda a xeografía do concello, con máis de 60 exemplares afectados e ducias deles cuxas ramas de maior ou menor consideración caídas, segundo explicou o responsable de Parques e Xardíns.
No caso concreto da Alameda, Domínguez mostrouse “impactado” polo tres Tilos de “gran porte” que caeron no paseo central. Nesta liña, subliñou que, aínda que todas as árbores son importantes, nun espazo como este teñen un valor sentimental, paisaxístico e patrimonial “especial”.
Con todo, fixo fincapé en que o número de árbores afectadas neste xardín histórico non alcanzaría “nin un 1%” do mil exemplares que hai na contorna da Alameda. “Estamos a falar dunha incidencia moi baixa neste espazo, onde as árbores resistiron en xeral bastante ben”, puntualizou.
LABORES PREVENTIVOS E DE VIXILANCIA
Así mesmo, lembrou que os labores preventivos e de vixilancia “son habituais” en todos os parques da cidade e que o tratamento deste xardín histórico conta cun traballo “diario e sistemático” de tarefas de poda, rega, plantación, abono e prevención de enfermidades, entre outras.
“A empresa concesionaria ten encomendado auditar o estado das árbores e de advertir dos problemas que poidan aparecer tomando as medidas oportunas en cada caso”, explicou Domínguez.
Neste sentido, destacou a importancia de manter un ecosistema san e unhas infraestruturas verdes “poderosas”, que aguanten estes refachos de vento, porque así a propia natureza fai de “barreira” e protexe deste tipo de episodios.
“PRIORÍZASE A CONSERVACIÓN”
Pola súa banda, Gregorio López esgrimiu que non puideron aproveitar nada dun dos tilos da Alameda debido a que os danos eran “moi grandes”, polo que procederon á súa eliminación. Aínda así, incidiu en que a política sempre é “priorizar a conservación”, é dicir, tratar de manter a estrutura dos exemplares.
Con todo, ambos coincidiron na “resiliencia” da Alameda e no nivel de resistencia das súas árbores, que “non é fácil atopar nun xardín histórico como leste”. Ademais, insistiron en que os fortes refachos de vento foron a causa das caídas, aínda que explicaron que a auga da choiva tamén fai un “efecto esponxa” sobre a terra e faina máis branda.
