A partir da segunda metade deste martes, a situación meteorolóxica complicouse en Santiago de Compostela debido á chegada da borrasca Kirk, anteriormente un furacán. A AEMET activou a alerta amarela en toda Galicia, incluída a capital, debido ás precipitacións intensas que poderán superar os 15 mm/h e alcanzar os 40 mm en doce horas. O interior da provincia da Coruña está tamén en risco por ventos fortes de ata 70 km/h procedentes do suroeste.
O peor deste temporal espérase para o hoxe, mércores, cando os ventos poderían alcanzar forza 8 ou 9 na escala de Beaufort, con ondas de 6 a 7 metros nas costas atlánticas. Ademais, as rachas de vento poderán superar os 100 km/h en zonas altas de Galicia, mentres que as choivas persistentes no oeste poderían deixar acumulados ata 120 mm en 24 horas.
En Santiago, a Xunta de Galicia mantén activo o Plan Inungal ante o risco de desbordamentos. O río Tambre está en niveis superiores aos habituais, e hai varias zonas da cidade con risco de inundacións, como a rotonda do Multiusos de Sar ou a rúa do Franco no casco histórico. Ante o risco de ventos fortes, o Concello de Santiago decidiu pechar varios parques desde este mediodía.
Dende a central de emerxencias do 112 recoméndase á poboación adoptar medidas de prevención, como evitar zonas fluviais, retirar vehículos das marxes dos ríos e buscar zonas elevadas en caso de inundación.