O Partido Popular de Santiago acolleu esta pasada semana unha nova sesión do Espazo Cultural CompArte, un foro de reflexión política inaugurado en outubro do pasado ano. Nesta ocasión, o coloquio abordou o impacto que terá a recente chegada de Donald Trump á presidencia dos Estados Unidos, centrándose nos retos e oportunidades que supón para Europa e España.
O encontro, que reuniu máis de cen asistentes na sede do PP compostelán, contou coa participación do líder do partido na cidade, Borja Verea, quen destacou a importancia de analizar os cambios políticos internacionais: “Estamos ante un fito histórico que plantexa retos, oportunidades ou ameazas. Ábrese unha etapa difícil, pero tamén un tempo de decisións”, sinalou.
Durante a súa intervención, Verea tamén reflexionou sobre o impacto da nova política exterior dos Estados Unidos en conflitos como os de Gaza e Ucraína, así como o interese estratéxico do país norteamericano en Groenlandia. “Non é un tema novo, xa hai 150 anos EE.UU intentou adquirila despois de comprar Alaska”, recordou. Neste sentido, destacou que Europa ten ante si a disxuntiva de reforzar a súa presenza no escenario internacional ou asumir un papel secundario.
A mesa redonda estivo composta polo coronel de intendencia da Armada, Santiago Avánzana González-Llanos, o profesor de Ciencia Política da USC, Miguel Anxo Bastos, e o xornalista e exdirector da edición española do The Washington Post, Alberto Avendaño. A sesión foi moderada por María Méndez, presidenta da Asociación de Periodistas de Galicia (APG).
No coloquio abordáronse cuestións como o papel das tropas estadounidenses en conflitos internacionais, a relación de España coa OTAN e as estratexias económicas e comerciais de Trump.
O coronel Avánzana destacou que a presenza militar estadounidense en España non é tan relevante como se adoita crer e sinalou que o país xa contribúe máis á OTAN do que o presidente estadounidense afirma. Tamén apuntou que ve difícil que Europa e España poidan asumir os requirimentos económicos esixidos por Trump.
Pola súa banda, Alberto Avendaño, cunha ampla traxectoria como xornalista nos Estados Unidos, compartiu a súa experiencia cubrindo a política americana. Considerou que Trump é un líder con escasa empatía e que non inspira confianza nin como personaxe nin polo equipo que o rodea.
Por último, Miguel Anxo Bastos explicou que Trump utiliza os aranceis como ferramenta de presión máis que como medida económica e que, a pesar de coñecer os efectos negativos que poden ter para a economía estadounidense, continúa a empregar este mecanismo como parte da súa estratexia política.
O líder do PP en Santiago, Borja Verea, destacou a boa acollida que está a ter o Espazo Cultural CompArte, sinalando que “cada vez son máis os veciños e veciñas que se achegan á sede local para participar nestes encontros” e que este tipo de iniciativas permiten que o partido funcione como “un laboratorio de ideas conectado coa sociedade”.
O foro continuará organizando novas sesións sobre temas de actualidade política, con expertos de diferentes ámbitos, coa intención de consolidarse como un punto de encontro para a reflexión e o debate na cidade.
