Un menor resultou ferido de gravidade na tarde deste mércores no concello coruñés de Val do Dubra, ao ser atropelado por un turismo na parroquia de Portomouro, concretamente na rúa de Entreponte. Segundo informou o 112 Galicia, o aviso chegou ás centrais de emerxencia arredor das 15:30, activándose de inmediato un operativo con medios sanitarios, forzas de seguridade e voluntariado.
O menor, que segundo os primeiros datos podería ter fracturas e un golpe na cabeza, foi evacuado nun helicóptero medicalizado con base en Santiago ata o centro hospitalario de referencia. O propio alcalde do municipio confirmou a gravidade do estado do neno e a necesidade dun exame médico completo.
No dispositivo participaron profesionais do 061, Policía Local, Garda Civil de Tráfico e membros de Protección Civil de Val do Dubra, que colaboraron nas tarefas de asistencia e evacuación.
