O Concello de Brión culminou recentemente a recuperación de dous importantes elementos do seu patrimonio histórico e etnográfico: os conxuntos fonte-lavadoiro de Boaventura e do Alqueidón. Estas actuacións foron posibles grazas a unha subvención do Instituto Galego de Estudos do Territorio, cun investimento total próximo aos 25.000 euros.
O alcalde de Brión, Pablo Lago, subliñou que estas intervencións forman parte dunha estratexia para “recuperar o noso patrimonio municipal e corrixir os impactos paisaxísticos causados por obras inadecuadas”. Nos dous casos, as reformas centráronse en substituír materiais inapropiados por outros máis acordes coa contorna.
No conxunto de Boaventura, as obras consistiron en eliminar o formigón presente e substituílo por placas de granito que harmonizan mellor co conxunto. Ademais, melloráronse os accesos ao lavadoiro, creando unha escaleira de pedra e pavimentando a contorna con lousas.
No caso do Alqueidón, o traballo centrouse en mellorar os muros de pedra, rexuntando con pigmentos naturais para respectar a estética tradicional. A cuberta foi limpa e pintada, preservando a cruz de pedra de valor histórico situada sobre ela. Finalmente, substituíuse parte do asfalto por pavimento de lousas de pedra.
Estas actuacións permiten non só recuperar e preservar o patrimonio local, senón tamén integralo mellor na paisaxe, enriquecendo a experiencia dos veciños e visitantes.
