Os deputados do Grupo Popular no Parlamento de Galicia, Ángel Rodríguez e Magdalena Pérez, visitaron este venres o Centro de Formación e Experimentación Agraria de Sergude, no concello de Boqueixón, onde puxeron en valor a importancia deste tipo de ensino para asegurar o relevo xeracional no agro galego.
Durante o percorrido polas instalacións, acompañados polo alcalde Ovidio Rodeiro, os representantes populares coñeceron de primeira man a actividade docente dun centro que ofrece formación práctica en materias agrarias e forestais, adaptada ás demandas actuais do sector agrogandeiro. Segundo destacaron, esta orientación profesional favorece que o alumnado poida incorporarse con rapidez ao mercado laboral.
O PP lembrou que a rede de centros de formación agraria da Xunta abrangue tamén os de Guísamo, Pedro Murias (Ribadeo), Monforte de Lemos, Becerreá e Lourizán (Pontevedra). En conxunto, estes centros manteñen estreitos vínculos coas empresas do sector, que o pasado ano acolleron prácticas de estudantes en arredor de setenta entidades, o que contribúe, segundo sinalaron, a que o índice de inserción laboral do alumnado sexa próximo ao 100%.
Rodríguez e Pérez subliñaron que a formación agraria é “unha ferramenta fundamental para manter vivo o tecido rural galego” e animaron a continuar fortalecendo a colaboración entre administracións, centros educativos e empresas para impulsar novas xeracións de profesionais no campo galego.
