O Concello de Boqueixón anunciou que porá en marcha unha auditoría técnica da súa rede de saneamento, cun investimento próximo aos 15.000 euros, co obxectivo de mellorar a eficiencia e a calidade do servizo que se presta á veciñanza.
Segundo explicou o alcalde, Ovidio Rodeiro, a actual rede municipal conta con 92 quilómetros de tubaxes, 14 depuradoras, 13 estacións de bombeo, unha nova estación depuradora de augas residuais (EDAR) e preto de 1.500 conexións. “Trátase dunha infraestrutura potente que nos permite ofrecer un servizo adaptado ás necesidades de cada núcleo e que seguirá reforzándose con novas actuacións tras esta auditoría”, indicou.
Nos últimos anos, o municipio impulsou proxectos como a posta en marcha da nova depuradora de Sergude ou a implantación dun sistema de foxas sépticas comúns con infiltración no terreo para pequenos grupos de vivendas. Con estas medidas, o goberno local prevé que o saneamento chegue ao 100% dos núcleos de poboación, o que Rodeiro considera “un feito excepcional nun concello rural”.
O rexedor tamén lembrou que Boqueixón xa alcanzara un fito singular na provincia ao garantir que toda a veciñanza dispoña de abastecemento de auga de calidade, e destacou que o novo plan permitirá consolidar este modelo de xestión integral da auga.
