Dúas persoas tiveron que ser trasladadas a un centro hospitalario tras sufrir síntomas de intoxicación, posiblemente causados pola mala combustión dunha estufa de pellets en Boqueixón. Un dos afectados, ademais, resultou ferido ao caer despois de sentirse mal, segundo informou a central de emerxencias.
Unha das afectadas foi quen, arredor das 2:15 da pasada madrugada, contactou co 112 solicitando asistencia médica. Pedía unha ambulancia tanto para si mesma, ao sentirse indisposta, como para o seu irmán, que tamén sufrira desmaios.
O incidente tivo lugar na súa residencia situada no lugar de Pumares, en Sergude, dentro do termo municipal de Boqueixón.
Dende o 112 deuse aviso ao 061, aos Bombeiros de Ordes, á Garda Civil e aos volutarios de Protección Civil do municipio para a súa intervención no suceso.
Ao chegar ao domicilio, a Garda Civil verificou que había dúas persoas afectadas, sendo que unha delas chegou a perder a consciencia temporalmente. De acordo cos axentes, tratábase dunha vivenda moi pequena. Por iso, apagaron a estufa e procederon a airear o espazo.
Finalmente, ambas as persoas foron trasladadas a un hospital para recibir atención médica adecuada.
