O Concello de Boqueixón informou de que o 98,1% das súas aldeas xa contan con servizo de fibra óptica tras a incorporación, durante o pasado verán, dos núcleos de A Igrexa (A Granxa), Loureiro (Pousada), O Cubelo (Vigo), O Casal (Lamas) e o novo núcleo da Alboia. Con estas últimas actuacións, 104 dos 106 núcleos de poboación dispoñen agora deste servizo.
As únicas excepcións son as aldeas de Loureda (Loureda) e Orto (Boqueixón), onde aínda non hai infraestrutura de postes de teléfono para dar cobertura. Segundo indicou o Concello, a compañía Rede Aberta está en proceso de xestionar os permisos necesarios con Naturgy e Udesa para utilizar a rede de postes eléctricos e así completar a cobertura nestes núcleos.
O alcalde de Boqueixón, Ovidio Rodeiro, afirmou que ‘a finais de 2024, o 100% dos núcleos contarán con fibra óptica’, quedando só casos puntuais que se abordarán de forma individualizada. Rodeiro subliñou a importancia deste servizo para o teletraballo, a telemedicina, o estudo e o desenvolvemento económico local, destacando que a fibra óptica é clave para mellorar a calidade de vida no concello.
