O Concello de Ames participa por sexto ano consecutivo na Semana Europea da Mobilidade, promovendo actividades que fomentan a mobilidade activa e sostible, o uso do transporte público e alternativas de transporte limpas. O lema desta edición é ‘Espazo Público Compartido‘, que busca concienciar sobre a necesidade de compartir o espazo urbano de forma eficiente e respectuosa co medio ambiente.
As actividades, que se desenvolverán entre os días 20 e 22 de setembro, inclúen unha marcha ciclista nocturna, xogos en bicicleta para nenos e unha andaina pola senda verde entre O Milladoiro e Bertamiráns. As persoas interesadas aínda están a tempo de inscribirse enviando un correo electrónico a mobilidade@concellodeames.gal.
A programación arranca o venres, 20 de setembro, cunha marcha ciclista nocturna que partirá ás 22:00 horas dende a praza do Concello. O percorrido, de oito quilómetros, está deseñado para ser accesible a toda a familia. A Policía Local recorda a importancia de usar casco, luces e chaleco reflector para garantir a seguridade dos participantes.
O sábado, 21 de setembro, celebrarase a actividade ‘Xogos en bici’, dirixida a nenos e nenas de entre catro e doce anos, de 17:00 a 20:00 horas no aparcadoiro de Agriños, en fronte da escola infantil do Milladoiro. Esa mesma noite, o DJ WANA ofrecerá unha sesión musical no aparcadoiro da Casa da Cultura do Milladoiro a partir das 20:30 horas.
A xornada final será o domingo, 22 de setembro, cunha andaina pola senda verde entre O Milladoiro e Bertamiráns. A saída será ás 10:00 horas dende a igrexa de San Xosé, no Milladoiro. Para facilitar a participación, disporase dun servizo de autobús para trasladar aos veciños entre Bertamiráns e O Milladoiro ao finalizar a actividade.
A Semana Europea da Mobilidade, promovida pola Comisión Europea desde o ano 2002, ten como obxectivo animar ás cidades e vilas a adoptar hábitos de mobilidade máis sostibles e respectuosos co medio ambiente.
