O Concello de Ames, a través do departamento de Deportes, organiza durante os meses de xullo e agosto varios cursos de natación que están a ter lugar nas piscinas descubertas de Bertamiráns e do Milladoiro. Este ano, un total de 111 nenos e nenas se inscribiron nesta iniciativa, que conta coa colaboración da Deputación da Coruña.
Durante o mes de xullo, 57 rapaces e rapazas participaron nas clases, con 34 inscritos no Milladoiro e 23 en Bertamiráns. En agosto, a participación mantense alta, con 54 nenos e nenas inscritos, 28 no Milladoiro e 26 en Bertamiráns.
A concelleira de Deportes, Susana Señorís, xunto con Alberto Viaño, técnico de Deportes, visitaron onte as piscinas para comprobar de primeira man o desenvolvemento dos cursos. “O programa está dedicado a ocupar o tempo de lecer dos nenos e nenas durante as vacacións do verán. Deste xeito, tamén aprenden a practicar un deporte novo”, comentou a concelleira. Ademais, sinalou que “estes cursos permiten que os rapaces e rapazas aprendan a nadar e se familiaricen coa auga, ao tempo que pasan un bo rato con outros nenos e nenas”.
As piscinas descubertas municipais están abertas ao público desde mediados de xuño, cun horario de 11:00 a 21:00 horas, de luns a domingo. Na praia fluvial de Tapia, o horario é de 15:00 a 21:00 horas durante a semana, e de 11:00 a 21:00 horas os sábados e domingos. Estas instalacións estarán dispoñibles ata o 15 de setembro, contando con servizo de vixilancia e socorrismo.
