O Concello de Ames, a través da Concellaría de Benestar Social, Igualdade e Voluntariado, organizou por primeira vez un programa de conciliación dirixido a mozos e mozas con diversidade funcional durante os meses de xullo e agosto. O programa, que se desenvolveu en Bertamiráns de luns a venres, en horario de 9:00 a 14:00 horas, contou con 38 participantes, 24 deles en xullo e 14 en agosto.
A concelleira de Benestar Social e Voluntariado, Uxía García, explicou que este novo programa nace “como resposta á demanda que viñan facendo moitas familias de Ames e da contorna”, co obxectivo de facilitar a conciliación durante o verán. García engadiu que “é o primeiro ano que organizamos este programa, polo que servirá para mellorar aspectos de cara a futuras edicións”. O programa tamén contempla a posibilidade de implicar a máis concellos na iniciativa nos próximos anos.
Durante o programa, os participantes realizaron diversas actividades, como obradoiros de cerámica, pintura, teatro, e relaxación. Entre as actividades máis populares destacaron os obradoiros de cociña, onde elaboraron pizzas, tortas e empanadillas. Tamén se organizaron saídas diarias a cafeterías e actividades de compra en grupo para fomentar a autosuficiencia.
Ademais, puxeron en marcha un clube de lectura, no que leron o libro Charlie e a fábrica de chocolate de Roald Dahl. Esta actividade está deseñada para mellorar a atención, a comprensión lectora e a memorización.
Os mozos e mozas tamén participaron en excursións á praia de Tapia e a Ponte Maceira, así como en rutas polo monte e arredores do río Tambre, co fin de coñecer diferentes localizacións da contorna amesá.
