O Bloque Nacionalista Galego de Ames defenderá no pleno ordinario de abril unha iniciativa para impulsar a construción de vivenda pública en Bertamiráns a partir de parcelas de titularidade municipal. A formación considera que a dispoñibilidade destes terreos representa unha oportunidade para ampliar a oferta residencial accesible nun concello onde, segundo sinalan, a vivenda pública prevista concéntrase actualmente no Milladoiro.
A voceira nacionalista, Escarlata Pampín, advertiu das dificultades existentes para acceder á vivenda no municipio. Segundo explicou, “especialmente para a xente nova e as familias con ingresos medios é case imposible o acceso á vivenda polos prezos e porque a oferta dispoñible non cobre a demanda”. Neste contexto, engadiu que esta situación provoca consecuencias sociais como a imposibilidade de emancipación da mocidade, o traslado de familias a outros concellos ou o incremento da desigualdade.
Pampín tamén incidiu no impacto económico que supón o custo da vivenda para a veciñanza: “Non falamos de números, falamos de xente que traballa en Ames e non pode vivir aquí, de parellas que atrasan proxectos vitais, ou de familias que destinan unha parte excesiva do seu salario ao alugueiro”. A este respecto, a portavoz defendeu a necesidade de reorientar as políticas públicas para incrementar a oferta de vivenda accesible e garantir prezos asumibles.
Esta proposta xa fora presentada polos nacionalistas no marco das negociacións orzamentarias, aínda que, segundo indican, foi rexeitada polo goberno municipal do PSOE, que argumentou que os procedementos de alleamento das parcelas estaban en fase de licitación e non podían modificarse.
Na moción que se debaterá no pleno, o BNG propón que os terreos municipais se cedan á Xunta de Galicia para promover vivendas de protección autonómica ou de integración social. Ademais, contemplan outras opcións como a licitación ou cesión das parcelas en condicións favorables para facilitar a participación de promotores privados, sempre baixo criterios que garantan a limitación de prezos e o acceso a vivenda protexida.
“A finalidade é garantir que calquera das opcións adoptadas priorice o acceso á vivenda da veciñanza especialmente da mocidade, persoas con baixos ingresos e colectivos en situación de vulnerabilidade”, concluíu Pampín.
