A formación política UCIN fixo pública a súa denuncia pola situación na que, segundo sinala, se atopa a Biblioteca Municipal do Milladoiro, no concello de Ames. A través do seu coordinador autonómico, José Luis Calo, a organización advertiu de filtracións reiteradas, deficiencias estruturais e falta de mantemento nun equipamento que cualifica de esencial para a veciñanza.
Segundo expón a formación, nas últimas datas difundíronse imaxes nas que se poden observar cubos recollendo auga no interior das instalacións e varias placas do falso teito retiradas. Para UCIN, estas escenas “non son propias dun edificio público en funcionamento, senón dunha infraestrutura abandonada á súa sorte”.
Calo manifestou que “é absolutamente intolerable que un espazo destinado ao estudo, á lectura e á formación da nosa mocidade teña que operar en condicións que comprometen tanto a conservación do material bibliográfico como a seguridade das persoas usuarias”.
A organización sinala que a persistencia das filtracións pode derivar en deterioro irreversible de libros e documentos, así como en posibles incidencias nas instalacións eléctricas. Tamén alerta de problemas de salubridade asociados á humidade continuada.
Neste sentido, o coordinador autonómico de UCIN sostén que “a cultura non pode depender de parches nin de solucións provisionais ano tras ano” e engade que, ao seu xuízo, “o que se precisa é unha intervención integral e definitiva no inmoble”.
PETICIÓNS E EXPLICACIÓNS AO CONCELLO DE AMES
A formación reclama ao Goberno municipal de Ames que informe con detalle sobre as actuacións previstas para resolver esta situación, así como o calendario estimado para a súa execución. Considera que a veciñanza do Milladoiro “merece instalacións públicas dignas e en condicións óptimas, especialmente nun servizo básico como é unha biblioteca municipal”.
Finalmente, José Luis Calo instou ao executivo local a actuar “con carácter urxente” para evitar que os problemas se agraven co paso das semanas e ante as condicións meteorolóxicas do inverno. “A responsabilidade na xestión pública mídese tamén no coidado dos espazos culturais que vertebran a vida dunha comunidade”, concluíu.
