O Concello de Ames dará este xoves o pistoletazo de saída ao Nadal 2025-2026 cun acto de acendido do alumeado que chega con novidades e cun marcado carácter festivo. A celebración terá lugar na praza do Concello en Bertamiráns, a partir das 17:45, cun programa que combina música, participación veciñal e actividades pensadas para dinamizar o comercio local.
A presentación do evento realizouse esta mañá no salón de plenos, coa presenza da concelleira de Promoción Económica, Ana Belén Paz; da presentadora do acto, Marta Alonso, e do presidente da Xuntanza de Empresarios de Ames (XEA), Ramón Cordido. A responsable municipal destacou que Ames contará con máis de 140 elementos luminosos repartidos por todo o termo municipal, incluíndo arcos decorativos, motivos tridimensionais e novidades tanto no Milladoiro como en Bertamiráns. Paz subliñou que o acendido irá acompañado da tradicional repartición de chocolate con churros, que se servirá dende o inicio das actuacións para que “a xente poida desfrutar da degustación mentres participa da festa”.
O acto estará conducido pola actriz e presentadora Marta Alonso e polo artista Pablo Reboleiro, ambos veciños de Ames. Alonso animou a acudir con accesorios e roupa de Nadal para “encher de cor e ambiente festivo a praza”, mentres que Cordido avanzou que este acendido será o punto de partida dun programa de actividades comerciais, entre elas a nova edición do concurso ‘Ilumina o teu sorriso’, que XEA presentará a próxima semana xunto ao Concello.
UN ACEDIDO CO PÚBLICO PROTAGONISTA
Ás 18:00 terá lugar o acendido das luces, momento no que se desvelará a identidade das persoas que premerán o botón, elixidas entre o público asistente. Ademais, este ano inclúese un concurso de caracterización no que se premiará a dúas persoas que acudan con mellor vestiario ou accesorios de Nadal. Os gañadores recibirán vales de 50 euros para gastar en establecementos adheridos a XEA, unha iniciativa pensada para apoiar ao comercio local nestas datas.
A banda sonora do acto correrá a cargo de arredor de 50 alumnos e alumnas da Escola Municipal de Música de Ames e dos coros de Bertamiráns e do Milladoiro do programa Amessán, que ofrecerán pequenas intervencións musicais durante a tarde.
ILUMÍNASE ATA O 6 DE XANEIRO
O alumeado permanecerá aceso cada día entre as 18:00 e as 02:00 dende este mesmo xoves e ata o 6 de xaneiro, con instalacións distribuídas por todas as parroquias. No Milladoiro, entre os elementos máis destacados figuran unha árbore artificial transitable na rúa Agro do Medio, unha estrutura tridimensional coas siglas de Ames na praza da Madalena, unha manta de luces na rúa Anxeriz e varios motivos luminosos na avenida de Rosalía de Castro. En Bertamiráns, a árbore da praza do Concello volverá ser o elemento central, acompañada dun motivo co número 2026 na praza da Maía.
Coa combinación de iluminación, actividades culturais e propostas comerciais, o Concello aspira a consolidar unha tarde de encontro comunitario que marque o inicio dun Nadal que en Ames terá unha programación ampla e repartida por todo o municipio.
