O alcalde de Ames, Blas García, afirmou que a sinatura do convenio entre o Concello de Santiago e o Consorcio Provincial de Bombeiros é “inminente” e que só “faltan uns flocos por pechar”. Así o comunicou tras manter conversas co presidente da Deputación da Coruña, Valentín González Formoso, quen lle confirmou que o acordo se atopa “nun estado avanzado” e próximo a formalizarse.
García fixo estas declaracións ao ser preguntado polos medios sobre a situación do parque comarcal de bombeiros de Santiago, que nas últimas semanas atravesou diversas dificultades de xestión e persoal. O rexedor lembrou que este “non é un problema exclusivo de Santiago, senón que afecta a todos os concellos da área metropolitana” e que “os alcaldes levamos moitísimo tempo reclamando un servizo estable e coordinado”.
O alcalde amesán destacou que a Xunta de Galicia aposta por que sexan as cidades as que asuman a xestión comarcal dos parques, polo que pediu “que o convenio se faga dunha vez”. “Levamos dous anos esperando e, a día de hoxe, aínda non está asinado”, insistiu.
Finalmente, García expresou o seu desexo de que o acordo se concrete canto antes “polo ben da cidadanía da comarca” e para garantir un servizo de emerxencias eficaz e coordinado entre Santiago e os municipios limítrofes.
