O Concello de Ames conmemora o Ano Castelao cunha nova cita escénica na súa programación cultural. Este venres, 31 de outubro, ás 20:30, o auditorio da Casa da Cultura de Bertamiráns será o escenario da comedia Mofa e Befa: Os dous de sempre. O regreso, unha produción da compañía Producións Teatrais Excéntricas dirixida a público adulto e que conta coa colaboración da Xunta de Galicia a través da Axencia Galega das Industrias Culturais (AGADIC).
A obra, dirixida por Quico Cadaval e coa dramaturxia de Carme Varela, rende homenaxe ao universo humorístico de Castelao recuperando as personaxes de Pedriño e Rañolas, interpretadas por Evaristo Calvo e Víctor Mosqueira, con participación tamén de Jostio Porto. Estes dous amigos inseparables —idealista un, pragmático o outro— representan a esencia da parella cómica galega, situando o público ante unha mestura de sátira, retranca e crítica social.
Mofa e Befa: Os dous de sempre. O regreso revisita o humor gráfico de Castelao e dálle corpo sobre o escenario, facendo dialogar bufóns, pallasos, nenos e tolos nun espectáculo que conxuga tradición e vangarda. A peza propón unha reflexión sobre o poder do humor como patrimonio colectivo, convidando a rir e a pensar ao tempo.
Con máis de vinte anos de traxectoria, Producións Teatrais Excéntricas consolidouse como unha das compañías galegas máis recoñecidas, cun estilo no que o humor serve de ferramenta crítica e irónica. A súa carreira inclúe éxitos como as adaptacións de O Porco de Pé de Vicente Risco ou Auto do Castromil de Manuel María, que sumaron centos de representacións por toda Galicia.
A compañía foi distinguida con diversos galardóns, entre eles varios Premios María Casares e o Premio de Honra Roberto Vidal Bolaño ao Mérito nas Artes Escénicas no ano 2017. A entrada á función forma parte da programación cultural municipal impulsada polo Concello de Ames para celebrar os 75 anos do pasamento de Castelao, figura central da cultura galega.
