A CIG-Ensino alertou da “situación crítica” na que se atopa a Escola Infantil Merlín de Ames, pechada desde comezos de setembro e cun persoal que leva máis dun mes sen poder traballar nin cobrar os seus salarios. O sindicato denuncia que as educadoras se atopan “sen comunicación oficial coherente” nin por parte da empresa concesionaria nin da Xunta de Galicia, mentres que o Concello de Ames ofrece, segundo afirman, “vagas respostas burocráticas” que non permiten desbloquear a situación.
A central sindical considera que o caso supón “un proceso de desmantelamento dun servizo público esencial e da destrución de postos de traballo perfectamente viábeis”. A pesar de que, segundo a CIG, existe xa unha nova empresa disposta a asumir a xestión do centro, o edificio continúa pechado “por trabas burocráticas” e sen data para a súa reapertura.
As traballadoras acumulan xa tres meses sen percibir os seus salarios —correspondentes a xullo, agosto e setembro—, o que agrava unha situación que o sindicato cualifica de “anómala e insostíbel”. A incerteza afecta tamén ás familias usuarias, que seguen sen saber cando poderán retomar a escolarización das súas fillas e fillos nunha escola financiada con fondos da Xunta de Galicia.
A CIG-Ensino sinala directamente como responsables á empresa familiar saínte, dirixida por Carmen Santoro e Carlos Porto Santoro, á que acusan de “incompetencia e desleixo” por non cumprir coa súa principal obriga: pagar ás traballadoras. O sindicato lembra que xa presentou varias denuncias ante a Consellería de Política Social e Xuventude e que esta “segue mirando para outro lado” malia as advertencias.
A organización sindical tamén comunicou unha nova denuncia ante a Inspección de Traballo e reclama unha resposta “urxente e efectiva” que inclúa tres medidas principais: a reapertura inmediata da escola, o abono das nóminas pendentes e a garantía da continuidade dos postos de traballo e do servizo educativo público.
A CIG recoñece que tanto o Concello como a empresa entrante están a traballar para resolver o bloqueo, pero advirte que “non é admisíbel seguir xogando cos dereitos laborais das traballadoras nin co dereito das familias a un servizo educativo esencial”.
“Non se pode permitir que, baixo a escusa dun cambio de xestión, se deixen a familias sen escola e a traballadoras sen dereitos. Estamos ante un novo episodio de desmantelamento de servizos esenciais e imos esixir responsabilidades”, conclúe o comunicado do sindicato.
