O FC Meigas inicia este sábado 30 de agosto a súa andaina competitiva da tempada coa disputa da fase inicial da XIX Copa Galicia feminina, na que se enfrontará ao Vilalba FS. O encontro terá lugar ás 20:00 no pavillón municipal de Bertamiráns, e o vencedor desta eliminatoria medirá forzas na seguinte rolda contra o Burela FS.
A escuadra amesá chega a este debut oficial tras completar tres semanas de pretempada e dous amigables fronte a Composala e Ourense Ontime B, ademais de ter programados dous novos encontros preparatorios na primeira semana de setembro, contra o FSF Castro (día 3) e o Estrela Futsal (día 6).
O plantel do Meigas presenta dez incorporacións, procedentes de Madrid, Ávila, León, Cantabria, Brasil e Colombia, que se suman ás cinco xogadoras que continúan da pasada campaña. O equipo afronta así a súa terceira tempada consecutiva na Segunda Federación Futsal feminina, con obxectivo de consolidar o proxecto deportivo.
O calendario competitivo tamén inclúe outra cita destacada: o 13 de setembro, o conxunto amesán recibirá ao Valdetires Ferrol na fase previa da Copa da Raíña, torneo no que participará por segundo ano consecutivo. Pola súa banda, a liga de Segunda Federación dará comezo a partir da terceira fin de semana de setembro.
Segundo sinalan desde o club, o novo grupo combina xuventude e experiencia internacional, e busca reforzar a proxección do Meigas tanto no ámbito galego como estatal. O debut deste sábado en Bertamiráns marcará o punto de partida dunha tempada chea de retos para o fútbol sala feminino en Ames.
