O Concello de Ames, a través das Concellarías de Promoción Económica e Mocidade, e en colaboración coa Xuntanza de Empresarios de Ames (XEA), presentou esta mañá no parque do Ameneiral a cuarta edición da iniciativa ‘Volta ao cole co comercio’, unha proposta que combina actividades infantís e sorteos para dinamizar o comercio e a hostalaría local nos días previos ao inicio do curso escolar.
As xornadas terán lugar o 3 de setembro no Milladoiro (zona verde da travesía do Porto) e o 5 de setembro en Bertamiráns (parque do Ameneiral), en horario de 17:00 a 20:30. O programa inclúe inchables diferenciados por idades, maquillaxe infantil e unha holi party con polvos de cores, ademais dun sorteo final de 40 vales de 20 euros cada un, organizados polo Concello, para gastar en librarías e papelerías dos dous núcleos.
Entre os comercios participantes atópanse establecementos de Bertamiráns como Mainomen, Leria, Eva Hogar, Chavián, Carlín, Recunchos Didácticos, Dipe Regalos e Bandini; e do Milladoiro como Nenos Nais, Mouse, Boo, Anauco, Folerpa e Piedra Papel Tijera.
A maiores, a XEA porá en marcha unha ruleta con premios directos –libretas, bolígrafos, rotuladores, xogos, bolsas de tea e lambetadas– á que se poderá acceder con compras superiores a 10 euros nos comercios adheridos.
Durante a presentación, a concelleira de Promoción Económica, Ana Belén Paz, destacou que “este xa é o cuarto ano que facemos a Volta ao Cole e, ademais de dinamizar as nosas rúas, buscamos axudar ás familias economicamente co inicio do curso cos sorteos de vales en material escolar”. Pola súa parte, a concelleira de Mocidade, Carmen Porto, subliñou que “a volta ás aulas supón un gran desembolso económico, polo que esta iniciativa supón un pequeno apoio e, ao tempo, unha xornada de diversión para a rapazada”.
A xerente de XEA, Beatriz López, explicou que nesta edición mudouse o sistema de participación nos sorteos, “de maneira que con compras superiores a 10 euros nos comercios adheridos se garante un premio seguro”. López engadiu que nas pasadas edicións os establecementos de papelería e librería “notaron un aumento considerable nas vendas”.
