A música, a troula e a participación veciñal seguen sendo protagonistas no concello de Ames coa chegada das festas da Peregrina a Bertamiráns, que se celebran desde este mércores, 6 de agosto, ata o domingo 10, no marco do programa conxunto ‘Ames en Festas 2025’, que por cuarto ano consecutivo enlaza as celebracións nos dous principais núcleos do municipio: O Milladoiro e Bertamiráns.
Tras cinco días de festexos no Milladoiro, onde se congregaron arredor de 7.000 persoas, a actividade cultural e musical trasládase a Bertamiráns. A apertura corre a cargo da orquestra Cinema e do DJ Sergio Telmo, mentres que os vindeiros días traerán ao escenario nomes como Panorama, Metrópolis ou Compostela, así como concertos de artistas locais e do ámbito galego.
Durante as festas da Madalena no Milladoiro, que comezaron o 1 de agosto co Millarock, a programación combinou propostas infantís, verbena, rock e un pregón a cargo de mozos da asociación Arcea-Adames, entidade referente no traballo pola inclusión. A verbena de peche, coa orquestra Olympus, tivo que ser suspendida por motivos meteorolóxicos e será reprogramada.
FESTIVAL EMERXENTE E ROMARÍA URBANA
Un dos principais atractivos desta edición das festas é a primeira edición do Festival Emerxente, que se celebra o xoves 7 de agosto no parque do Ameneiral. A cita pretende ser unha plataforma de visibilidade para novos artistas da contorna, que poderán presentar os seus proxectos ante o público. Participarán Helena Pazos, Mr. T, Lepayitss e Komojo, nunha tarde dedicada á música en directo.
Tamén destaca no calendario a romaría urbana do sábado 9, que busca revitalizar o centro da vila e dinamizar o consumo local. Comezará ao mediodía cunha sesión vermú e concertos de Tabernarias, para continuar con actuacións de Arde, Monoulious Dop, Luis Fercán e Biribirlocke, ademais de contar con postos de comida, obradoiros e inchables para os máis pequenos.
PROGRAMACIÓN DIVERSA E CARAVANA MORADA
A proposta da Peregrina inclúe tamén pasarrúas diarios, actividades para a infancia e sesións vermú. O venres 8, o artista Mondra, natural de Teo, ofrecerá un concerto no parque do Ameneiral, presentando o seu último traballo De Ronda. Ese mesmo día, a verbena estará amenizada pola Charleston Big Band e a disco móbil CDC Visual.
Ademais, na noite do xoves 7 estará operativa unha caravana morada, situada no aparcadoiro do Pazo da Peregrina entre as 22:00 e as 5:00, para atender e denunciar calquera agresión machista que puidese producirse durante as festas.
O peche da programación será o domingo 10, cunha completa xornada que inclúe actuacións da Banda de Música de Calo, da agrupación Airiños do Paseo de Colón, e unha sesión vermú e verbena da man da orquestra Compostela. O pregón de despedida, ás 22:30, será pronunciado por Ronald Rojas, veciño migrante de Venezuela asentado en Bertamiráns.
O programa ‘Ames en Festas 2025’, promovido polo Concello de Ames, as comisións organizadoras da Madalena e da Peregrina e Xuventude Ames, ofrece durante estas dúas semanas unha ampla e diversa proposta cultural que aposta pola música galega, a participación local e a dinamización do espazo público.
