Un vehículo ardeu ao mediodía deste martes na estrada SC-20, nas inmediacións da rotonda do Milladoiro, á altura do barrio compostelán de Conxo, causando importantes retencións de tráfico e unha densa columna de fume, aínda que non houbo que lamentar vítimas.
Segundo informou o 112 Galicia, o suceso ocorreu pouco antes das 12:00 e non provocou danos persoais, malia a alarma xerada entre os condutores que circulaban por este tramo da estrada que conecta Santiago co sur da comarca. O tráfico viuse afectado temporalmente na zona mentres se procedía á extinción do lume e á retirada do vehículo afectado.
Ata o lugar desprazáronse os Bombeiros de Santiago, que lograron sufocar as lapas, así como efectivos da Garda Civil, que regulaban o tráfico e aseguraban a zona. O fume xerado polo incendio foi visible desde distintos puntos da contorna, o que provocou inquietude entre a veciñanza e os condutores.
