O pavillón de Bertamiráns acolleu este martes de Entroido unha nova edición do Cocido dos Maiores de Ames, un evento que reuniu arredor de 700 veciños e veciñas do concello. A celebración incluíu música, disfraces e un xantar tradicional con cocido galego, creando un ambiente festivo e de convivencia.
A xornada comezou ás 14:00 horas, cando os camareiros e camareiras comezaron a servir o menú tradicional composto por sopa e o cocido galego. A temática deste ano centrouse no cine, polo que moitos asistentes se animaron a participar no concurso de disfraces.
O alcalde de Ames, Blas García, abriu o acto dedicando unhas palabras aos maiores: “Esta comida é de xustiza para as persoas maiores de Ames que levan traballando toda a vida e, polo menos unha vez ao ano, merecen que a Corporación municipal teña un detalle con elas. Este día é para que se xunten e gocen dun gran martes de Entroido”.
A celebración continuou pola tarde coa actuación musical do dúo Plan B, que animou aos asistentes con cancións coñecidas, logrando que moitos se sumasen ao baile e á festa. Ademais, os mellores disfraces foron premiados cun sorteo de cestas con produtos típicos do Entroido.
Para garantir a participación de todos, o Concello de Ames puxo a disposición un servizo de autobús que percorreu as parroquias, facilitando o traslado ao pavillón e o regreso ás casas.
Entre os asistentes destacou a participación de gran parte da Corporación municipal, incluíndo ao alcalde Blas García e representantes do Partido Popular de Ames, amosando así o apoio institucional a esta iniciativa dirixida aos maiores do municipio.
