Un estudo liderado pola Universidade de Santiago de Compostela e a Axencia Internacional para a Investigación en Cancro (IARC), publicado en Lancet Public Health, revela que unha xeración libre de tabaco podería evitar ata 1,2 millóns de mortes por cancro de pulmón en todo o mundo. A medida, que prohibiría a venda de produtos de tabaco a persoas nadas a partir dun ano específico, foi tomada en consideración en varios países, pero este é o primeiro estudo que estima o seu impacto global.
A investigación, que abarca 185 países, baseouse nun escenario no que se prohibiría o consumo de tabaco a persoas nadas entre 2006 e 2010, asumindo unha aplicación perfecta da medida. Segundo os datos, evitaríanse o 40,2% das mortes por cancro de pulmón esperadas nese grupo ata o ano 2095.
A USC destaca que, en España, esta medida evitaría unhas 21.900 mortes, das cales 11.600 serían de homes e 10.300 de mulleres. Isto suporía unha redución do 71,9% das mortes en homes e do 73,1% en mulleres. A nivel global, as cifras varían por rexións, sendo Europa Occidental a zona onde se evitaría a maior porcentaxe de mortes (73,6%).
“A pesar de que a porcentaxe de mortes evitables é maior en homes globalmente, en rexións como Norteamérica e Europa Occidental é maior en mulleres”, destacou o equipo investigador da USC, composto por profesorado da área de Medicina Preventiva e Saúde Pública.
