A Xunta de Galicia presentará o vindeiro 19 de setembro, en Santiago de Compostela, as conclusións do estudo sobre a reforma do mapa municipal de Galicia, nun congreso que reunirá a técnicos, académicos e xestores municipais. O obxectivo principal do evento será discutir a racionalización da planta municipal e explorar novas fórmulas de cooperación intermunicipal.
Durante o congreso, terá lugar a presentación do ‘Estudo sobre a planta local galega’, unha análise multidisciplinar realizada en colaboración coa Fundación Juana de Veiga e as tres universidades galegas. O estudo examina o impacto de procesos de fusión municipal en Galicia, tomando como referencia as experiencias dos concellos de Oza-Cesuras e Cerdedo-Cotobade. Analizáronse aspectos como a repercusión económica e a calidade dos servizos tras estas fusións, co obxectivo de avaliar o modelo e considerar novas posibilidades para mellorar a xestión local.
