A doutora e investigadora da área Didáctica de Ciencias Experimentais da Universidade de Santiago de Compostela (USC) Sabela Fernández e a bióloga e pedagoga Paz Picallo promoveron un estudo para favorecer a aprendizaxe en nenos de seis a oito anos con necesidades especiais.

Así o informa o centro de innovación educativa VermisLAB que, en colaboración coa Universidade de Santiago de Compostela, publicou o estudo ‘Young Children’s Creative Products in a STEAM Project’, realizado por ambas as expertas.

O traballo está centrado na inclusión do alumnado con necesidades educativas especiais. As actividades propostas promoven o uso da tecnoloxía e a robótica educativa, así como o deseño e construción de proxectos arquitectónicos.